Tramp administrasiyası miqrantlarla bağlı məlumatların təqdim edilməsi üçün ştatlara yeni tələb qoyub

ABŞ Ədliyyə Nazirliyi ştatlara xəbərdarlıq edib ki, qanunsuz yaşayan miqrantlarla bağlı məlumatları təqdim etmədikləri təqdirdə, milyardlarla dollarlıq federal sosial yardım vəsaitindən məhrum ola bilərlər.

ABŞ Ədliyyə Nazirliyinin Hüquq Məsələləri İdarəsinin yaydığı xəbərdarlıq Tramp administrasiyasının miqrasiya siyasəti çərçivəsində atdığı yeni addım kimi qiymətləndirilir.

Yeni qaydalara əsasən, iki əsas sosial yardım proqramı üzrə federal maliyyə alan ştatlar ABŞ-də qanunsuz yaşayan şəxslər barədə məlumatları Daxili Təhlükəsizlik Nazirliyinə təqdim etməlidir.

Əvvəllər bu tələb yalnız həmin proqramları idarə edən qurumlara şamil edilirdi. Yeni qaydalar isə universitetlər və nəqliyyat vasitələrinin qeydiyyatını həyata keçirən dövlət qurumları da daxil olmaqla, digər strukturları əhatə edə bilər.

ABŞ Ədliyyə Nazirliyinin Baş prokuror köməkçisi Joshua Craddock bildirib ki, tələblərə əməl etməyən ştatlar federal maliyyədən məhrum ola bilər.

Milyardlarla dollarlıq maliyyə riski

Söhbət aztəminatlı ailələrə yardım proqramı (TANF) və Əlavə Təhlükəsizlik Gəliri (SSI) proqramlarından gedir. TANF proqramı üzrə illik federal maliyyələşmə 16,5 milyard dollardan, SSI proqramı üzrə ödənişlər isə 60 milyard dollardan çoxdur.

Qanuni miqrasiya statusu olmayan şəxslər bu proqramlardan yararlana bilməz.

ABŞ Ədliyyə Nazirliyinin rəyi qanun qüvvəsinə malik deyil, lakin federal qurumlar üçün məcburi xarakter daşıyır. Qərarın Demokratların rəhbərlik etdiyi ştatların hüquqi etirazları ilə üzləşəcəyi gözlənilir. Bəzi ştatlar administrasiyanın dövlət qurumlarında saxlanılan şəxsi məlumatlara çıxış imkanlarını genişləndirmək cəhdlərinə qarşı artıq məhkəməyə müraciət edib.

Hazırda ən azı 19 ştat və Kolumbiya dairəsi qanuni miqrasiya statusu olmayan şəxslərə sürücülük vəsiqəsi almağa icazə verir. Bəzi dövlət universitetləri də bu şəxsləri qəbul edir. Yeni qaydalar federal qurumların qanuni miqrasiya statusu olmayan milyonlarla insan barədə məlumatlara çıxış əldə etməsinə imkan yarada bilər.

Kopyalandı