Əfqanıstan və Belarus tibbi əməkdaşlığı genişləndirmək barədə razılığa gəlib

Əfqanıstan və Belarus tibbi əməkdaşlığı genişləndirmək barədə razılığa gəlib
Əfqanıstanın səhiyyə naziri Nur Cəlal Cəlali Belarusun səhiyyə nazirinin müavini Boris Androsyukla rəsmi səfər zamanı. Belarus, 28 sentyabr 2026-cı il.
Afghanistan Ministry of Public Health
EN

Müəllif

Tameem Bahiss

AZ

Azərbaycan dili

Günel Məmmədova

Əfqanıstan və Belarus dərman, tibbi avadanlıq və tibb işçilərinin peşə hazırlığı sahələrində əməkdaşlığı genişləndirmək barədə razılığa gəlib. Razılaşma sentyabrın 29-da Minskdə iki ölkənin səhiyyə nazirləri arasında keçirilən görüşdən sonra əldə olunub.

Əfqanıstanın səhiyyə naziri Nur Cəlal Cəlali nümayəndə heyəti ilə birlikdə səhiyyə sahəsində əməkdaşlığı gücləndirmək üçün Belarusa səfər edib.

Əfqanıstanın Səhiyyə Nazirliyinin məlumatına görə, tərəflər Əfqanıstana dərman idxalı, tibbi avadanlıqla təminat, səhiyyə işçilərinin peşə hazırlığının artırılması, eləcə də tədqiqat və məlumat mübadiləsini müzakirə ediblər.

Cəlali bildirib ki, Əfqanıstan müxtəlif ölkələrlə səhiyyə sahəsində əməkdaşlığı genişləndirməyə və peşəkar təcrübə, tibbi avadanlıq, dərman və səhiyyə xidmətləri sahəsində tərəfdaşlıqdan yararlanmağa çalışır.

Səfər Əfqanıstan səhiyyə sisteminin çətinliklərlə üzləşdiyi vaxta təsadüf edir

Cəlalinin nümayəndə heyəti ilə birlikdə Belarus Dövlət Tibb Universitetinə, dövlət əczaçılıq şirkətinə, kardiologiya, onkologiya və tibbi radiologiya, gigiyena, epidemiologiya və ictimai səhiyyə, eləcə də təcili tibbi yardım müəssisələrinə baş çəkməsi gözlənilir. 

Səfər Əfqanıstanın səhiyyə sisteminin maliyyə və resurs çatışmazlığı ilə üzləşdiyi bir vaxtda baş tutur. Ümumdünya Səhiyyə Təşkilatının (ÜST) hesablamasına görə, 2026-cı ildə ölkədə 14,4 milyon insanın səhiyyə yardımına ehtiyacı var.

2025-ci ildə maliyyələşmənin azalması səbəbindən ən azı 422 ilkin səhiyyə müəssisəsi, o cümlədən mobil səhiyyə və qidalanma qrupları bağlanıb. Bu, təxminən 3,3 milyon insanın tibbi xidmətlərə çıxışını məhdudlaşdırıb.

Əfqanıstan səhiyyə sahəsində beynəlxalq əməkdaşlığı genişləndirir

Əfqanıstanın səhiyyə sistemi maliyyə çatışmazlığı, ixtisaslı səhiyyə işçilərinin azlığı və əsas tibbi xidmətlərə çıxışın məhdudluğu kimi problemlərlə üzləşir. 

Belarus səfəri Kabulun səhiyyə xidmətləri, tibbi təhsil, əczaçılıq istehsalı və ixtisaslaşmış tibbi xidmətlər sahəsində əməkdaşlığı genişləndirmək səylərinin bir hissəsidir. 

Teqlər

Əfqanıstan Belarus səhiyyə tibb Nur Cəlal Cəlali dərman tibbi avadanlıq ÜST Kabul Minsk
comments
share