Səudiyyə Ərəbistanının din xadimləri müqəddəs məkanlara hücum cəhdlərini pisləyiblər

Səudiyyə Ərəbistanının din xadimləri müqəddəs məkanlara hücum cəhdlərini pisləyiblər
Səudiyyə Ərəbistanında rəsmilər havada zərərsizləşdirilən ballistik raketlərin qalıqlarını yoxlayırlar. 24 oktyabr, 2026-cı il.
Reuters

Səudiyyə Ərəbistanının tanınmış din xadimləri müqəddəs məkanlara və mülki şəxslərə qarşı hücumları pisləyiblər. Onların açıqlamaları Səudiyyə rəsmilərinin Məkkə və Mədinə bölgələri istiqamətində atılan iki ballistik raketin havada zərərsizləşdirildiyini bildirməsindən sonra səsləndirilib.

Səudiyyə Ərəbistanının dövlət televiziyası “Al Ekhbariya”nın məlumatına görə, Məkkədəki Məscidül-Həram və Mədinədəki Peyğəmbər məscidinin Dini İşlər İdarəsinin rəhbəri Əbdürrəhman əs-Südeys, eləcə də Peyğəmbər məscidinin imamı Saleh əl-Məğamisi raket qalıqlarının Məkkə yaxınlığına düşməsi ilə bağlı açıqlama veriblər.

Əs-Südeys bildirib ki, müqəddəs məkanların, mülki şəxslərin və mülki obyektlərin hədəf alınması dini prinsiplərə, humanitar dəyərlərə və beynəlxalq hüquq normalarına ziddir.

Əl-Məğamisi də husilərin Məkkə və Mədinədəki müqəddəs məkanları hədəf almaq cəhdlərini pisləyib. Onun sözlərinə görə, bu cür hücumlar dini prinsiplərə ziddir və insanların müqəddəs məkanlarda təhlükəsizliyini təhdid edir.

Raket qalıqlarının Məkkə yaxınlığına düşdüyü bildirilir

“Al Ekhbariya” telekanalının məlumatına görə, havada vurulan raketlərdən birinin qalıqları Məscidül-Həramdan təxminən 21 kilometr şərqdə, Ərəfatdan isə 7 kilometr məsafədə yerləşən Vadi əl-Muğammas ərazisinə düşüb.

Telekanalın məlumatında Vadi əl-Muğammas yaşayış məhəllələrinin yaxınlığında yerləşən açıq hava istirahət zonası kimi təsvir olunub.

Səudiyyə Ərəbistanı iki raketin zərərsizləşdirildiyini açıqlayıb

Səudiyyə Ərəbistanının Mülki Müdafiə İdarəsi oktyabrın 24-də Yəməndən Məkkə və Mədinə bölgələri istiqamətində atılan iki ballistik raketin havada zərərsizləşdirildiyini açıqlayıb.

Qurumun məlumatına görə, raket qalıqları Məkkədəki Vadi əl-Muğammas ərazisinə, həmçinin Ciddə, Taif və Rabiqdəki bəzi ərazilərə düşüb. Səudiyyə rəsmiləri raketlərin husilər tərəfindən atıldığını bildiriblər.

Husilərin hərbi sözçüsü Yəhya Səri isə “X” platformasında yayımladığı bəyanatda qruplaşmanın Məkkə və Mədinədəki müqəddəs məkanları hədəf alması ilə bağlı ittihamları rədd edib. O bildirib ki, husilərin hücumları Səudiyyə Ərəbistanının neft obyektlərinə və hərbi bazalarına yönəlib.

Teqlər