Özbəkistan ABŞ ilə 12 milyard dollarlıq sazişlər imzalayıb

Özbəkistan ABŞ ilə 12 milyard dollarlıq sazişlər imzalayıb
Bibi Xanım məscid kompleksi. Səmərqənd, Özbəkistan, 5 may 2019-cu il.
Gilad Rom / Creative Commons CC-BY 2.5
EN

Müəllif

Sevil Rəcəbova

AZ

Azərbaycan dili

Kənan Novruzov

Səmərqənddə keçirilən C5+1 formatında nazirlər görüşündə ABŞ ilə Mərkəzi Asiya ölkələri arasında iqtisadi əməkdaşlığın genişləndirilməsi müzakirə olunub. 

Diplomatik əməkdaşlıqdan iqtisadi layihələrə

2015-ci ildə yaradılan C5+1 formatı ABŞ və Mərkəzi Asiyanın beş ölkəsini – Qazaxıstan, Qırğızıstan, Tacikistan, Türkmənistan və Özbəkistanı birləşdirir. Format çərçivəsində ilk nazirlər görüşü həmin ilin noyabrında Səmərqənddə keçirilib.

Əvvəlcə əsas diqqət diplomatiya və təhlükəsizlik məsələlərinə yönəlsə də, sonradan əməkdaşlıq ticarət, investisiya, enerji və regional nəqliyyat sahələrini də əhatə edib.

Oktyabrın 19-da keçirilən görüşdə siyasi razılaşmaların konkret iqtisadi layihələr vasitəsilə həyata keçirilməsi əsas müzakirə mövzularından biri olub. ABŞ və Mərkəzi Asiya ölkələri Transxəzər Ticarət Marşrutunun inkişafı, nəqliyyat əlaqələrinin və gömrük prosedurlarının təkmilləşdirilməsi, sənaye əməkdaşlığının genişləndirilməsi, həmçinin kritik əhəmiyyətli mineralların daha yüksək əlavə dəyərlə emalının artırılması barədə razılığa gəliblər.

Vaşinqton Mərkəzi Asiya ilə iqtisadi əməkdaşlığı genişləndirməyə çalışır. ABŞ C5+1 formatından ayrı-ayrı ölkələrlə ikitərəfli danışıqlara əlavə olaraq, regional layihələrin əlaqələndirilməsi üçün əsas mexanizmlərdən biri kimi istifadə etməyi hədəfləyir.

Özbəkistan ABŞ ilə 12 milyard dollarlıq sazişlər imzalayıb

İri kommersiya razılaşmaları C5+1 formatında nazirlər görüşü ilə paralel keçirilən Özbəkistan–ABŞ Biznes və İnvestisiya Şurasının ikinci iclasında açıqlanıb.

Özbəkistanın İnvestisiyalar, Sənaye və Ticarət Nazirliyinin məlumatına görə, ticarət, investisiya və texnologiya sahələrində 54 sazişdən ibarət paket imzalanıb. Sazişlərin həyata keçirilməsinə ümumilikdə təxminən 12 milyard dollar ayrılması nəzərdə tutulur.

Razılaşmalar nəqliyyat və enerji infrastrukturu, sənaye, kritik əhəmiyyətli minerallar, maliyyə, rəqəmsal texnologiyalar, kənd təsərrüfatı, səhiyyə və təhsil sahələrini əhatə edir.

Əməkdaşlıqda iştirak edən şirkətlər arasında dəmir yolu avadanlıqları və komponentlərin yerli istehsalına dəstək verməsi nəzərdə tutulan “Wabtec”, eləcə də “Franklin Templeton”, “Oppenheimer & Co.”, “Citigroup” və “BlackRock” kimi iri maliyyə qurumları var.

Teqlər

ABŞ Mərkəzi Asiya İqtisadi əlaqələr Özbəkistan 12 milyard dollarlıq razılaşmalar C5+1 formatı Qazaxıstan
comments
share