Günün icmalı: Avropada yaşayış xərclərinin artmasına qarşı etirazlar

Həftəsonu Fransa, Albaniya, Portuqaliya, Belçika və İtaliyada kütləvi etiraz aksiyaları keçirilib. Nümayişlərə yaşayış xərclərinin artması, mənzil çatışmazlığı, təhsil sahəsindəki problemlər və hökumətlərin siyasətindən narazılıq səbəb olub.

Bir sıra şəhərlərdə etirazçılarla polis arasında toqquşmalar baş verib.

Fransada kütləvi etirazlar iğtişaşlarla müşayiət olunub

Oktyabrın 17-də Fransada yaşayış xərclərinin artmasına, sosial bərabərsizliyə və dövlət xidmətlərinin keyfiyyətinin aşağı düşməsinə qarşı keçirilən kütləvi etiraz aksiyaları bir sıra şəhərlərdə iğtişaşlarla müşayiət olunub.

Daxili işlər naziri Loran Nünyesin məlumatına görə, aksiyalarda təxminən 550 min nəfər iştirak edib. Həmkarlar ittifaqlarından biri isə iştirakçıların sayının 800 min olduğunu bildirib.

Paris, Marsel və Lion da daxil olmaqla, bir sıra şəhərlərdə etirazçılarla polis əməkdaşları arasında toqquşmalar baş verib. Yanğınlar, qarət halları və dövlət binalarına hücumlar qeydə alınıb.

İlkin məlumatlara görə, iğtişaşlar zamanı 1 200-dən çox insan saxlanılıb. Prezident Emmanuel Makron zorakılıq törədənlərin qanun qarşısında cavab verəcəyini bildirib.

Albaniyada tələbələrin etiraz aksiyası polislə toqquşmaya çevrilib

Albaniyanın paytaxtı Tiranada oktyabrın 17-də Baş nazir Edi Ramanın istefasını tələb edən tələbələrlə polis arasında toqquşmalar baş verib.

Etirazlara hökumətdə korrupsiya ilə bağlı iddialar, işsizlik və təhsilin keyfiyyətinin aşağı olması səbəb olub. Yayılan görüntülərə əsasən, polis nümayişçilərə qarşı rezin güllələrdən istifadə edib.

Etirazlar zamanı çox sayda insan saxlanılıb. Yeddi polis əməkdaşı isə xidməti pozuntularla bağlı iddialara görə vəzifəsindən müvəqqəti uzaqlaşdırılıb.

Baş nazir Edi Rama istefa tələblərini rədd edib və vətəndaşların etiraz etmək hüququnun qorunacağını bildirib.

Portuqaliyada on minlərlə insan bahalığa və mənzil böhranına etiraz edib

Portuqaliyanın paytaxtı Lissabonda oktyabrın 17-də on minlərlə insan yaşayış xərclərinin artmasına və mənzil böhranının dərinləşməsinə qarşı etiraz aksiyasına qatılıb.

Nümayişçilər bildiriblər ki, əməkhaqları kirayə və mənzil qiymətləri, eləcə də gündəlik xərclər qədər artmır.

Ölkədə mənzil qiymətləri 2017-ci ildən bəri iki dəfədən çox artıb. Sentyabrda inflyasiya 3,6 faizə çatıb.

Etirazlara baxmayaraq, sağ mərkəzçi hökumət nümayişçilərin təzyiqi qarşısında geri çəkilməyəcəyini bildirib. Rəsmilər mənzil böhranının həlli üçün artıq müəyyən tədbirlər görüldüyünü vurğulayıblar.

Belçikada təhsil xərclərinə qarşı etirazlar polislə toqquşmalara çevrilib

Belçikanın paytaxtı Brüsseldə oktyabrın 17-də yüzlərlə insan təhsil xərclərinin artmasına və təklif olunan islahatlara qarşı etiraz edib. Əsasən gənclərin iştirak etdiyi aksiya zamanı polislə toqquşmalar baş verib.

Polis nümayişçilərə qarşı gözyaşardıcı qaz və su şırnaqlarından istifadə edib. Bəzi etirazçılar isə avtomobili aşırıblar.

Tələbə təşkilatları hesab edirlər ki, təklif olunan islahatlar ali təhsil almaq imkanlarını məhdudlaşdıra bilər.

Etiraz aksiyaları Belçikanın şərqində yerləşən Lyej şəhərində də keçirilib.

İtaliyada bahalığa qarşı etirazlar polislə toqquşmalarla müşayiət olunub

İtaliyanın Milan və Bolonya şəhərlərində oktyabrın 17-də yaşayış xərclərinin artmasına qarşı keçirilən etiraz aksiyaları zamanı nümayişçilərlə polis arasında toqquşmalar baş verib.

Məlumata görə, Milanda nümayişçilər şəhərin məşhur kafedralı yaxınlığında polis əməkdaşlarına daş atıblar. Polis etirazçılara qarşı gözyaşardıcı qazdan istifadə edib.

Bolonyada isə polis nümayişçiləri dağıtmaq üçün su şırnaqlarından istifadə edib. Yeddi nəfər saxlanılıb.

Milanda baş verən iğtişaşlar zamanı bəzi mağazalar fəaliyyətini dayandırıb, turistlər isə təhlükəsizlik məqsədilə ərazidən uzaqlaşıblar. Bir neçə nəfərin xəsarət aldığı bildirilir.

Teqlər

Avropa bahalaşma etiraz aksiyaları Fransa Albaniya Emmanuel Makron Tirana İtaliya